आइल बसंत सिवान - डॉ एम डी सिंह
- एबी न्यूज, संवाददाता
- Feb 17, 2021
- 521 views
सहकल सरसों आम बउराइल महुआ तोड़त बा तान
फुलाइल तीसी गोहूं झूमत लेआइल बसंत सिवान
रहिला फूलल केराय गदराइल
बा उरुदी माटी में लथराइल
सियार सियारिन संग रहरि धइलस
ऊंखि के गउवाँ सम्मन मडराइल
नवा पहिन के लुग्गा झुल्ला सगर भइलैं पेड़ उतान
फुलाइल तीसी गोहूं झूमत लेआइल बसंत सिवान
रहरि ठाढ़ि भइल लेइके छवना
हरेट्ठा बोरन खरहरा लवना
मरदा सहकल मउगी भुसनाइल
गुदुरी कचरस के होई गवना
गुड़ महकल, खदकल जिउ लइका धाइ गइलैं कोल्हुआन
फुलाइल तीसी गोहूं झूमत लेआइल बसंत सिवान
ह बसंतपंचइया आजु ए भइया
त मिलिहैं सबके सुरसत्ती मइया
चन्दा जोगाड़ मूरत धरि के सभ
नचिहैं जोगाड़ी ता ता थइया
सुरसत्ती माई दीहैं सबकरा के हिक भर गुन गियान
फुलाइल तीसी गोहूं झूमत लेआइल बसंत सिवान
रिपोर्टर